Сингапур Умард Солонгос улстай худалдаа хийхээс татгалзлаа

Солонгосын хойгийн хурцадмал байдал, Умард Солонгосын дайсагналыг намжаахын тулд НҮБ, АНУ дорвитой алхам хэрэгжүүлж эхлээд байгаа. БНХАУ-ын дарга Ши Жиньпин тусгай элчээ Пхеньян руу илгээгээд байгаа бол Сингапур улс Умард Солонгостой хийж буй бүх худалдаагаа зогсоосон байна.

Тодруулбал энэ сарын 8-ны өдрөөс эхлэн Сингапур улсын Гаалийн алба Умард Солонгос улсаас импортолдог болон тус улс руу экспортолдог бараа бүтээгдэхүүнүүдээ зогсоожээ. Хэрэв энэ журмыг зөрчвөл торгууль оногдуулах, аль эсвэл 2 болон түүнээс дээш жил хорих юм байна. Умард Солонгос улс 6 дахь удаагаа цөмийн туршилт явуулсны дараа НҮБ хориг арга хэмжээгээ улам бүр чангатгаад байгаа.

2016 оны байдлаар Сингапур улс бол Пхеньяны 8 дахь том худалдааны түнш байсан юм. Мөн онд Кубаас Умард Солонгос руу зэр зэвсэг тээвэрлэхэд тусалсан Сингапурын компани 125,700 доллараар торгуульжээ.