Умард Солонгосын цөмийн туршилтын асуудлаар Өмнөд Солонгос болон АНУ-ын албаныхан мэдээлэл хийлээ
Ганбаатар Мөнх-Эрдэнэ
2016-09-12 18:19:29

Өнөөдөр БНСУ-ын Батлан хамгаалахын сайд Мун Сан Гюн Умард Солонгосын цөмийн туршилтын талаар мэдээлэл хийлээ. Тэрээр Умард Солонгос улс цөмийн туршилтын бүс дэх огт ашиглаагүй газар доогуурх хонгилд дахин цөмийн туршилт явуулах хүчин чадалтай талаар өнөөдөр анхааруулан хэлсэн байна. Хэдийгээр дээрх мэдээллийг ямар баталгаат эх сурвалжаас авсныг тайлбарлахаас татгалзсан боловч Өмнөд Солонгос улс болон АНУ-ын тагнуулын албаныхны мэдээлснээр Пхеньяны зүгээс дахин нэг удаа цөмийн бөмбөгийн туршилтыг ойрын үед явуулж болзошгүй байгаа гэсэн байна. Мун Сан Гюн мөн АНУ-ын бөмбөгдөгч онгоцуудыг Өмнөд Солонгосын Осан дахь АНУ-ын Агаарын зэвсэгт хүчний баазад хэдийд буулгах тухай цаг хугацааны асуудлыг талууд харгалзан үзэж, ярилцаж байгаа талаар мэдээлсэн байна.

Умард Солонгосын асуудал эрхэлсэн АНУ-ын тусгай төлөөлөгч Сун Ким ням гаригт Умард Солонгосын зүгээс явуулсан тав дахь удаагийн цөмийн туршилтын асуудлаар Японы талтай хамтарсан уулзалт явуулсан байна. Энэхүү уулзалтанд Японы талаас Гадаад Хэргийн Яамны Ази, Номхон далайн хэлтсийн дарга Кенжи Канасуги оролцсон байна. Талуудын уулзалтын төгсгөлд Сун Ким сэтгүүлчдэд хандан хэлсэн үгэндээ Пхеньяны энэхүү үйлдэл нь бүс нутгийн нөхцөл байдлыг улам тогтворгүй болгож байгааг онцлоод  тус улсын эсрэг шинэ хориг арга хэмжээнүүдийг авах бүхий л боломж, бололцоог АНУ болон Япон улсууд хамтран эрэлхийлж байгааг мэдээлсэн байна. Мөн хоёр улс энэ тал дээр БНХАУ-д шахалт үзүүлэхийг хичээж байгаа гээд Умард Солонгос улсыг илүү нааштай, эерэг чиглэл рүү шилжүүлэхэд Бээжингийн туслалцаа, дэмжлэг хэрэгтэй байгааг онцолсон байна.

Таалах
Хайрлах
Инээх
Бахархах
Уйтгарлах
Уурлах
Хариу бичих